ایران امریکہ جنگ کی خبر: آبنائے ہرمز کی بندش اور عالمی معیشت پر اثرات | اردو پوائنٹ پریس
ایران امریکہ جنگ کا خطرہ: صدر ٹرمپ کی تباہ کن حملوں کی دھمکی، آبنائے ہرمز مکمل بند
امریکہ کی ایران کو سخت وارننگ: آبنائے ہرمز کی بندش اور عالمی معیشت پر جنگ کے سائے
واشنگٹن/تہران: امریکہ اور ایران کے درمیان کشیدگی ایک بار پھر انتہائی خطرناک حد تک پہنچ گئی ہے، جہاں دونوں ممالک کی جانب سے سخت بیانات اور عسکری نقل و حرکت نے عالمی سطح پر تشویش کی لہر دوڑا دی ہے۔ امریکی صدر ڈونلڈ ٹرمپ نے ایران کو براہ راست دھمکی دیتے ہوئے کہا ہے کہ جب تک ایک حقیقی اور موثر معاہدہ نافذ نہیں ہو جاتا، تمام امریکی فوج، جنگی جہاز اور جدید ترین ہتھیار ایران کی سرحدوں کے اندر اور اس کے ارد گرد اپنی پوزیشنز پر موجود رہیں گے۔امریکی صدر نے واضح کیا ہے کہ اگر ایران کی جانب سے کسی بھی قسم کی اشتعال انگیزی کی گئی تو امریکہ ایسی طاقت سے حملے شروع کرے گا جو دنیا نے پہلے کبھی نہیں دیکھے ہوں گے۔ انہوں نے دو ٹوک الفاظ میں کہا کہ یہ بات پہلے ہی طے ہو چکی تھی کہ ایران کے پاس جوہری ہتھیار نہیں ہوں گے اور عالمی تجارت کے لیے اہم ترین راستہ، آبنائے ہرمز ہر صورت کھلا اور محفوظ رہے گا۔دوسری جانب، ایران نے آبنائے ہرمز کو مکمل طور پر بند کرنے کا اعلان کر دیا ہے۔ ایرانی میڈیا کے مطابق، آبنائے ہرمز کے بعض حصوں میں بارودی سرنگوں کی موجودگی کا خدشہ ظاہر کیا گیا ہے۔ ایرانی پورٹس اینڈ میری ٹائم آرگنائزیشن نے متبادل راستے متعین کرتے ہوئے کہا ہے کہ اب یہاں سے گزرنے والے جہازوں کو ایرانی پاسدارانِ انقلاب کے ساتھ تعاون کرنا ہوگا۔ رپورٹس کے مطابق، ایران اب اس راستے سے گزرنے والے جہازوں سے “ٹول ٹیکس” بھی وصول کرنے کا منصوبہ بنا رہا ہے اور اس سلسلے میں عالمی ثالثوں کو آگاہ کر دیا گیا ہے۔اس کشیدگی کے باعث عالمی منڈی میں خام تیل کی قیمتوں میں ڈھائی فیصد تک اضافہ دیکھا گیا ہے، جہاں برینٹ کروڈ کی قیمتوں میں نمایاں تیزی آئی ہے۔ ایشیائی اسٹاک مارکیٹس بشمول جاپان، شنگھائی اور بمبئی کے انڈیکسز میں ایک سے پونے دو فیصد تک کی بڑی گراوٹ ریکارڈ کی گئی ہے۔ پاکستان اسٹاک ایکسچینج میں بھی اس صورتحال کے باعث ملا جلا رجحان دیکھا جا رہا ہے۔آئی ایم ایف (IMF)، ورلڈ بینک اور عالمی ادارہ خوراک نے ایک مشترکہ بیان میں خبردار کیا ہے کہ مشرق وسطیٰ میں جنگ نہ صرف خطے بلکہ پوری دنیا کی معیشت اور خوراک کی فراہمی کو مفلوج کر دے گی۔ بیان کے مطابق، تیل اور گیس کی قیمتوں میں اضافے سے ٹرانسپورٹ کے مسائل پیدا ہوں گے، جس کا سب سے زیادہ بوجھ غریب ممالک پر پڑے گا۔ ایرانی وزیر خارجہ عباس عراقچی نے امریکہ کو مخاطب کرتے ہوئے کہا ہے کہ اسے انتخاب کرنا ہوگا کہ وہ جنگ بندی چاہتا ہے یا اسرائیل کے ذریعے اس خطے کو جنگ کی آگ میں دھکیلنا چاہتا ہے۔
ایران کے ’سپر جھٹکے‘: امریکہ میں آرمی چیف تبدیل، اسرائیلی انٹیلی جنس سربراہ غائب | تجزیہ: ملک توصیف احمد
تازہ ترین اپ ڈیٹس کے لیے ہمیں فالو کریں
اردو پوائنٹ پریس
#MalikTouseefAhmed | #UrduPointPress